អូស្រ្តាលី៖ អតីតនាយករដ្ឋមន្រ្តីអូស្រ្តាលី លោក Kevin Rudd ត្រូវបានតែងតាំងជាឯកអគ្គរាជទូតថ្មីរបស់អូស្រ្តាលី ប្រចាំនៅសហរដ្ឋអាមេរិក ស្របពេលដែលប្រទេសទាំងពីរកំពុងពង្រឹងកិច្ចសហប្រតិបត្តិការផ្នែកសន្តិសុខ ដែលជាការឆ្លើយតបទៅនឹងការកើនឡើងអំណាចរបស់ចិននៅក្នុងកិច្ចការនយោបាយអន្តរជាតិ។
នាយករដ្ឋមន្រ្តីអូស្ត្រាលីបច្ចុប្បន្ន លោក Anthony Albanese បានហៅលោក Kevin Rudd ថាជាអ្នកជំនាញបំផុតលើកិច្ចការអន្តរជាតិលើប្រទេសចិន ហើយថាលោកនឹងនាំយកបទពិសោធន៍ដ៏សំខាន់សម្រាប់តួនាទីនេះ នៅពេលដែលបញ្ហាការគ្រប់គ្រងក្នុងតំបន់កំពុងត្រូវបានផ្លាស់ប្តូរដោយការប្រកួតប្រជែងជាយុទ្ធសាស្រ្ត។
ក្នុងសន្និសីទសារព័ត៌មានមួយមុនដំណើរទស្សនកិច្ចផ្លូវរដ្ឋរបស់លោកស្រី Penny Wong រដ្ឋមន្រ្តីការបរទេសអូស្រ្តាលីទៅកាន់ប្រទេសចិន លោកនាយករដ្ឋមន្រ្តី Albanese ថ្លែងថា៖ "ការតែងតាំងលោក Kevin Rudd គឺជាការតែងតាំងដ៏ពិសេសបំផុតមួយ។ លោកបានផ្តល់កិត្តិយសបំផុតដល់ប្រទេសអូស្ត្រាលី ដោយយល់ព្រមទទួលតំណែងនេះក្នុងនាមជាអតីតនាយករដ្ឋមន្ត្រី ព្រមទាំងជាអតីតរដ្ឋមន្ត្រីការបរទេស"។
គួរបញ្ជាក់ថា លោក Kevin Rudd អាចនិយាយភាសាចិនកុកងឺ (Mandarin) បានយ៉ាងល្អដូចជនជាតិដើម។ លោកធ្លាប់បានសរសេរ និងនិយាយយ៉ាងទូលំទូលាយអំពីទំនាក់ទំនងការបរទេសនានាជាមួយប្រទេសចិន ចាប់តាំងពីលោកបានលាឈប់ពីនយោបាយនៅក្នុងឆ្នាំ២០១៣។ លោកបានបញ្ចប់ការសិក្សាថ្នាក់បណ្ឌិតនៅសាកលវិទ្យាល័យ Oxford ស្តីពីទស្សនៈពិភពលោករបស់ប្រធានាធិបតីចិន Xi Jinping កាលពីខែកញ្ញាកន្លងទៅ និងជាប្រធានទំនាក់ទំនងអន្តរជាតិនៃវិទ្យាស្ថាន Asia Society ប្រចាំនៅទីក្រុង New York ទៀតផង។
កាលពីខែកញ្ញាកន្លងទៅ លោកនាយករដ្ឋមន្រ្តី Anthony Albanese ក៏បានតែងតាំងអតីតរដ្ឋមន្រ្តីការបរទេស Stephen Smith ជាឯកអគ្គរាជទូតថ្មីរបស់អូស្រ្តាលី ប្រចាំនៅចក្រភពអង់គ្លេសផងដែរ ដោយលោកចាត់ទុកថានេះជាការឆ្លុះបញ្ចាំងពីសារៈសំខាន់នៃកិច្ចព្រមព្រៀងសន្តិសុខនាវាមុជទឹកនុយក្លេអ៊ែរ AUKUS ជាមួយសហរដ្ឋអាមេរិក និងចក្រភពអង់គ្លេស។
លោក Kevin Rudd នឹងចូលកាន់តំណែងជាផ្លូវការនៅដើមឆ្នាំ២០២៣ ខាងមុខនេះ ជំនួសតំណែងលោក Arthur Sinodinos៕
លោក Stephen Smith (ឆ្វេង) ជាមួយលោកនាយករដ្ឋមន្រ្តី Anthony Albanes
